ព្រះមហាក្សត្រទ្រង់បានឡាយព្រះហស្តដាក់ឲ្យប្រើប្រាស់ជាផ្លូវការហើយ នូវសេចក្តីស្នើវិសោធនកម្មច្បាប់ទាំង៤ ទាក់ទងការបែងចែកអាសនៈរបស់គណបក្សដែលត្រូវរំលាយ នៅថ្ងៃទី២៥ ខែតុលា ឆ្នាំ២០១៧នេះ បន្ទាប់ពីឆ្លងផុតក្រុមប្រឹក្សាធម្មនុញ្ញ កាលពីថ្ងៃទី២៤ ខែតុលា ឆ្នាំ២០១៧ តាមរយៈកិច្ចប្រជុំពេញអង្គរបស់ក្រុមប្រឹក្សាធម្មនុញ្ញ ក្រោមអធិបតីភាព ឯកឧត្តម ទេសរដ្ឋមន្ត្រី អ៊ឹម ឈុនលឹម ដើម្បីពិនិត្យ និងសម្រេចលើសំណើសុំពិនិត្យលើធម្មនុញ្ញភាពសេចក្តីស្នើវិសោធនកម្មច្បាប់ទាំង៤។
សេចក្តីស្នើសុំវិសោធនកម្មច្បាប់ទាំង៤នោះរួមមាន ទី១-ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ទី២-ច្បាប់ស្តីពីការបោះឆ្នោតជ្រើសតាំងព្រឹទ្ធសភា ទី៣-ច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ និងទី៤-ច្បាប់ស្តីពីការបោះឆ្នោតជ្រើសរើសក្រុមប្រឹក្សា ឃុំ សង្កាត់ ហើយបើតាមសេចក្តីប្រកាសព័ត៌មាន ក្រុមប្រឹក្សាធម្មនុញ្ញបានបញ្ជាក់ថា ច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រទាំង៤ នេះ គឺត្រឹមត្រូវស្របតាមរដ្ឋធម្មនុញ្ញ ហើយសេចក្តីសម្រេចនេះ គឺជាសេចក្តីសម្រេចជាស្ថាពរ បិទផ្លូវតវ៉ា មានអនុភាពអនុវត្តទៅលើអំណាចទាំងអស់ ដែលមានចែងក្នុងរដ្ឋធម្មនុញ្ញ និងត្រូវចុះផ្សាយក្នុងរាជកិច្ចផងដែរ ៕
0 comments