លោកនាយករដ្ឋមន្រ្ដី ហ៊ុន សែន៖ សុខភាពខ្ញុំ គឺរឹងមាំធម្មតា ហើយអ្វីដែលសំខាន់គឺពលរដ្ឋមានការងារធ្វើ និងរស់នៅសុខសប្បាយ

លោកនាយករដ្ឋមន្រ្ដី ហ៊ុន សែន នៅព្រឹកថ្ងៃទី២៥ ខែកក្កដា ឆ្នាំ២០១៩នេះ បានឲ្យដឹងថា សុខភាពរបស់លោក គឺរឹងមាំធម្មតា ហើយស្អែកលោកនឹងជួបភ្ញៀវ មកពីមូលនិធិអន្ដរជាតិសម្រាប់អភិវឌ្ឍន៍កសិកម្ម នៅទីស្ដីការគណៈរដ្ឋមន្ដ្រី។ ជាមួយគ្នានេះលោកនាយករដ្ឋមន្រ្ដី ហ៊ុន សែន ក៏បានអរគុណដល់ប្រជាពលរដ្ឋដែលបានជូនពរដល់លោក ខណៈដែលលោកអះអាងថា អ្វីដែលសំខាន់បំផុតសម្រាប់លោក គឺជនរួមជាតិមានការងារ មុខរបររស់នៅសុខសប្បាយ និងកូនចៅមានឱកាសទៅសាលារៀននៅគ្រប់ទីកន្លែង។ តាមរយៈ Facebook ផ្លូវការនៅព្រឹកថ្ងៃទី២៥ ខែកក្កដា ឆ្នាំ២០១៩នេះ លោកនាយករដ្ឋមន្រ្ដី ហ៊ុន សែន បានបញ្ជាក់យ៉ាងដូច្នេះថា «សុខសប្បាយជាទេ បងប្អូនជនរួមជាតិ? សុខភាពខ្ញុំ គឺរឹងមាំធម្មតាទេ។ ស្អែកនេះ ខ្ញុំជួបភ្ញៀវមកពីមូលនិធិអន្តជាតិសម្រាប់អភិវឌ្ឍន៍កសិកម្មនៅទីស្តីការ។ អរគុណបងប្អូនដែលបានជូនពរខ្ញុំ។ អ្វីដែលសំខាន់បំផុតចំពោះខ្ញុំ គឺបងប្អូនជនរួមជាតិមានការងារមុខរបររស់នៅសុខសប្បាយ និងកូនចៅមានឱកាសទៅសាលារៀននៅគ្រប់ទីកន្លែង។ ខ្ញុំសូមជូនពរ និងអរគុណបងប្អូនដែលបានចូលរួមថែរក្សាសន្តិភាព និងចូលរួមអភិវឌ្ឍប្រទេសជាតិយើងអោយកាន់តែរីកចម្រើនទៅមុខ» ៕