លោកនាយករដ្ឋមន្រ្តី ហ៊ុន សែន៖ កម្ពុជាមានតួនាទីជាអនុប្រធាននៃមហាសន្និបាតអង្គការសហប្រជាជាតិលើកទី៧៣

នៅរសៀលថ្ងៃទី២៥ ខែកញ្ញា ឆ្នាំ២០១៨នេះ លោកនាយករដ្ឋមន្រ្តី ហ៊ុន សែន បានបង្ហោះផ្សាយនៅក្នុងទំព័រហ្វេសប៊ុកផ្លូវការរបស់លោកដោយបានបញ្ជាក់ថា នៅថ្ងៃទី២៧ ខែកញ្ញា ឆ្នាំ២០១៨ខាងមុខនេះ លោកនឹងដឹកនាំគណៈប្រតិភូជាន់ខ្ពស់កម្ពុជាទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការសហប្រជាជាតិ ដែលកម្ពុជាមានតួនាទីដ៏សំខាន់ជាអនុប្រធាននៃមហាសន្និបាត (Vice President of the 73rd Session of the UN General Assembly 2018-2019) នៅទីក្រុងញូវយ៉ក សហរដ្ឋអាមេរិក។ លោកនាយករដ្ឋមន្រ្តី ហ៊ុន សែន ក៏បានបញ្ជាក់បន្ថែមថា ក្នុងពេលស្នាក់នៅសហរដ្ឋអាមេរិក លោកនឹងឆ្លៀតពេលជួបសំណេះសំណាលសួរសុខទុក្ខបងប្អូនប្រជាពលរដ្ឋខ្មែរ-អាមេរិកាំងដែលកំពុងរស់នៅទីនោះផងដែរ។ លោកបានបន្តថា ទោះបីរស់នៅទីណាក៏ដោយ គឺបងប្អូនជាមហាគ្រួសារខ្មែរតែមួយរបស់កម្ពុជាយើង។ លោកនាយករដ្ឋមន្រ្តី ហ៊ុន សែន ក៏បានផ្តាំផ្ញើសួរសុខទុក្ខបងប្អូនខ្មែរ-អាមេរិកាំងនៅគ្រប់រដ្ឋទាំងអស់ និងបានអរគុណចំពោះការត្រៀមទទួលស្វាគមន៍លោកនាពេលខាងមុខផងដែរ៕