លោកទេសរដ្ឋមន្ត្រី ឱម យ៉ិនទៀង ជួបសំណេះសំណាល និងណែនាំដល់អ្នកសង្កេតការណ៍ប្រឡងបាក់ឌុប ឆ្នាំ២០១៨

Credited: Fresh News: (ភ្នំពេញ)៖ នៅវេលាម៉ោង១៖០០រសៀល ថ្ងៃទី១៣ ខែសីហា ឆ្នាំ២០១៨នេះ លោកទេសរដ្ឋមន្ដ្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានជួបសំណេះសំណាល និងណែនាំដល់អ្នកសង្កេតការណ៍មធ្យមសិក្សាទុតិយភូមិ (បាក់ឌុប) នាសម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំសិក្សា២០១៧-២០១៨ នាថ្ងៃទី២០ ខែសីហា ឆ្នាំ២០១៨ ខាងមុខនេះ។ ពិធីនេះនឹងត្រូវធ្វើឡើងនៅសាលាតិចណូ (សាលសម្ដេចតេជោ ហ៊ុន សែន) រាជធានីភ្នំពេញ ដោយមានការអញ្ជើញចូលរួមពីសំណាក់លោក ហង់ ជួន​ណារ៉ុន រដ្ឋមន្ត្រីក្រសួងអប់រំ​ យុវជន និងកីឡា លោក ហ៊ុន ម៉ានី​ ប្រធានសហភាពសហព័ន្ធយុវជនកម្ពុជា (សសយក) និងស្ថាប័នពាក់ព័ន្ធ​ រួមទាំងអ្នកសង្កេតស្ម័គ្រចិត្តជាច្រើនផងដែរ។ សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ​(បាក់ឌុប) ឆ្នាំ២០១៨នេះ នឹងត្រូវប្រព្រឹត្តទៅរយៈពេល២ថ្ងៃ ចាប់ពីថ្ងៃទី២០ ដល់២១ ខែសីហា ឆ្នាំ២០១៨ ដោយមានសិស្សានុសិស្សប្រឡងចំនួន១១៧,០៦១នាក់ ចែកចេញជា២ក្រុមរួមមាន​ថ្នាក់វិទ្យាសាស្ត្រ​ចំនួន៥១.៧ភាគរយ និងថ្នាក់វិទ្យាសាស្ត្រសង្គម​ចំនួន៤៨.៣ភាគរយ ក្នុងនោះមានមណ្ឌលប្រឡងចំនួន១៩៥ មណ្ឌលមណ្ឌលប្រឡង​ថ្នាក់វិទ្យាសាស្ត្រ​មានចំនួន៩៩មណ្ឌល និងថ្នាក់វិទ្យាសាស្ត្រសង្គម​មានចំនួន៩៦មណ្ឌល៕