សាខាកាកបាទក្រហមកម្ពុជាខេត្តកំពត នាំយកអំណោយចែកជូនប្រជាពលរដ្ឋរងគ្រោះទឹកជំនន់ ចំនួន៥២៦គ្រួសារ

កំពត៖ នៅថ្ងៃទី២៣ ខែសីហា ឆ្នាំ២០១៨នេះ សាខាកាកបាទក្រហមកម្ពុជាខេត្តកំពត រួមនឹងសហការី ភរិយាថ្នាក់ដឹកនាំ និង មន្ទីរ-អង្គភាពជុំវិញខេត្ត ដឹកនាំដោយលោក ជាវ តាយ អភិបាលនៃគណៈអភិបាលខេត្ត និងជាប្រធានកិត្តិយសសាខាកាកបាទក្រហមខេត្តកំពត បានចុះសួរសុខទុក្ខ និងនាំយកអំណោយមនុស្សធម៌កាកបាទក្រហមកម្ពុជាខេត្តកំពត ចែកជូនប្រជាពលរដ្ឋរងគ្រោះ ចំនួន៥២៦គ្រួសារ នៅបរិវេណវត្តកំពូលមាស ភូមិភ្នំតូច ឃុំកណ្តោល ស្រុកទឹកឈូ ខេត្តកំពត។ នាឱកាសនោះ លោកអភិបាលខេត្តកំពត បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរពីសុខទុក្ខរបស់បងប្អូនប្រជាពលរដ្ឋ ជួបការលំបាក ទីទ័លក្រ មានជំងឺ ជនងាយរងគ្រោះ ជនរងគ្រោះដោយគ្រោះមហន្តរាយផ្សេងៗ ដោយមិនប្រកាន់រើសអើងវណ្ណៈ ជាតិសាសន៍ ពណ៌សម្បុរ ឬនិន្នាការនយោបាយអ្វីឡើយ និងសូមឲ្យបងប្អូនប្រជាពលរដ្ឋទាំងអស់ប្រកាន់យកនូវអនាម័យល្អ រស់នៅស្អាត ហូបស្អាត ផឹកស្អាត។ អំណោយដែលផ្តល់ជូនប្រជាពលរដ្ឋរងគ្រោះ រួមមាន ៖ អង្ករ២៥គីឡូក្រាម មី១កេស ស្ករត្នោត១គីឡូ ទឹកស៊ីអ៊ីវ១យួរ សាប៊ូ២ដុំ ទឹក១ធុងចំណុះ២០លីត្រ និងថវិកាក្នុងមួយគ្រួសារចំនួន ២០.០០០​រៀល​​ សរុប១០,៥២០,០០០រៀល៕