BREAKING NEWS: ទីបំផុតយន្តហោះ Air Force One របស់ប្រធានាធិបតីអាមេរិក លោក ដូណាល់ ត្រាំ មកដល់ទឹកដីសិង្ហបុរីហើយ

Credited: Fresh News : (សិង្ហបុរី)៖ ទីបំផុតប្រធានាធិបតីអាមេរិក លោក ដូណាល់ ត្រាំ បានធ្វើដំណើរមកដល់ប្រទេសសិង្ហបុរីដែរហើយ ខណៈលោក គីម ជុងអ៊ុន បានមកដល់កាលពីវេលារសៀល។ នេះបើតាមការដកស្រង់​ការផ្សាយចេញពីទីភ្នាក់ងារព័ត៌មាន Reuters នៅយប់ថ្ងៃអាទិត្យ ទី១០ ខែមិថុនា ឆ្នាំ២០១៨។ ក្រោយពីបានចាកចេញពី​កិច្ចប្រជុំ G7 នៅប្រទេសកាណាដា និងហោះឆ្លងកាត់មហាសមុទ្រប៉ាស៊ីហ្វិកអស់រយៈពេលជាច្រើនម៉ោងមក​ ទីបំផុតយន្តហោះ Air Force One របស់ប្រធានាធិបតីអាមេរិក លោក ដូណាល់ ត្រាំ បានធ្វើការចុះចតនៅឯមូលដ្ឋានទ័ពអាកាស Paya Lebar របស់​ប្រទេសសិង្ហបុរី ដើម្បីត្រៀមចូលរួមបើកកិច្ចប្រជុំកំពូលអាមេរិក-កូរ៉េខាងជើង ជាមួយលោក គីម ជុងអ៊ុន នៅថ្ងៃអង្គារខាង​មុខ​​នេះ។ គួរជម្រាបថា អំឡុងពេលធ្វើទស្សនកិច្ចនៅសិង្ហបុរី លោក ដូណាល់ ត្រាំ ត្រូវគេរំពឹងថានឹងស្នាក់នៅសណ្ឋគារ Shangri-La ខណៈលោក គីម ជុងអ៊ុន កំពុងស្នាក់នៅសណ្ឋាគារ St. Regis ដែលហ៊ុមព័ទ្ធទៅដោយកងអង្គរក្សរបស់កូរ៉េខាងជើង។ មុនពេលជួបលោក គីម នៅសណ្ឋាគារ Capella លើកោះ Sentosa នាថ្ងៃអង្គារ ​លោក ត្រាំ ក៏នឹងត្រូវជួបពិភាក្សាជាមួយនាយករដ្ឋមន្រ្តីសិង្ហបុរី លោក Lee Hsien Loong ដែល​ជា​ម្ចាស់​ផ្ទះផងដែរ នៅថ្ងៃស្អែក៕