លោកនាយករដ្ឋមន្រ្តី ហ៊ុន សែន ថ្លែងថា មានបក្សប្រឆាំងមួយដែលរលាយនោះបានព្យាយាមកេងចំណេញពីកម្មករ

លោកនាយករដ្ឋមន្ត្រី ហ៊ុន សែន បានថ្លែងថា មានគណបក្សប្រឆាំងមួយនោះដែលបានរលាយបាត់ទៅហើយ នៅពេលចោទសួរថាហេតុម្តេចបានជាមិនកសាងសមិទ្ធផលនានានៅលើទឹកដីកម្ពុជា គេបកស្រាយថាដោយសារមិនទាន់បានកាន់អំណាច ប៉ុន្តែនៅពេលរាជរដ្ឋាភិបាលខិតខំតម្លើងប្រាក់បៀរវត្សកម្មករកម្មការិនី មន្រ្តីរាជការ កងកម្លាំងប្រដាប់អាវុធ បែរជាគេលើកឡើងថាដោយសារការទាមទាររបស់ពួកគេទៅវិញ។ លោកបានថ្លែងដូចនេះ នៅព្រឹកថ្ងៃពុធទី៦ ខែមិថុនា ឆ្នាំ២០១៨ ក្នុងឱកាសជួបសំណេះសំណាលសួរសុខទុក្ខបងប្អូនកូនក្មួយកម្មករ កម្មការិនីប្រមាណជាង២ម៉ឺននាក់ មកពីរោងចក្រ សហគ្រាស ចំនួន៨ ស្ថិតក្នុងភូមិរវាង ឃុំថ្នល់ដំបង ស្រុកជើងព្រៃ ខេត្តកំពង់ចាម។ លោកនាយករដ្ឋមន្រ្តី ហ៊ុន សែន បានបញ្ជាក់ថា នៅពេលនេះ យើងឃើញកាន់តែច្បាស់ហើយថា ក្រុមប្រឆាំងមួយនោះតែងបានលើកឡើងថា គេមិនមានភារកិច្ចធ្វើប្រឡាយទឹក ផ្លូវថ្នល់ សូម្បីតែបង្គន់មួយក៏គ្មានដែរ តែបែរជាឃោសនាបោកប្រាស់យកចំណេញក្នុងចំណោមកម្មករយើងទៅវិញ៕