លោកនាយករដ្ឋមន្រ្តី ហ៊ុន សែន ផ្ញើសារជូនពរកងកម្លាំងនគរបាលទូទាំងប្រទេស និងប្រាប់ឱ្យបង្កើនសមត្ថភាពទប់ស្កាត់ការប៉ុនប៉ងបំផ្លាញការបោះឆ្នោតនៅចុងខែកក្កដា

លោកនាយករដ្ឋមន្រ្តី ហ៊ុន សែន បានផ្ញើសារជូនពរកងកម្លាំងនគរបាលជាតិទូទាំងប្រទេស ក្នុងឱកាសខួបលើកទី៧៣ ថ្ងៃបដិសន្ធិ របស់កងកម្លាំងនគរបាលជាតិកម្ពុជា (១៦ ឧសភា ១៩៤៥-១៦ ឧសភា ២០១៨) ដែលប្រសូត្រចេញពីស្នាព្រះហស្ថរបស់ ព្រះករុណា ព្រះបាទសម្ដេចព្រះនរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ។ នៅក្នុងសារលិខិតនោះ លោកនាយករដ្ឋមន្រ្តី ហ៊ុន សែន បានផ្ញើនូវការសាកសួរសុខទុក្ខ ជូនចំពោះថ្នាក់ដឹកនាំក្រសួងមហាផ្ទៃ ថ្នាក់ដឹកនាំអគ្គស្នងការដ្ឋាននគរបាលជាតិ និងមន្ដ្រីនគរបាលជាតិនៅទូទាំងប្រទេស ដោយសេចក្ដីនឹករលឹក ស្រឡាញ់រាប់អានយ៉ាងជ្រាលជ្រៅ និងស្មោះស្ម័គ្រអស់ពីដួងចិត្ត។ សារលិខិតបានបន្ថែមថា ស្របពេលដែលចលនាឧទ្ទាមរបស់ពួកក្បត់ជាតិ នៅតែមិនបោះបង់នូវមហិច្ឆតាប៉ុនប៉ងបង្កអស្ថិរភាពដល់ប្រទេសជាតិ ពិសេសការប៉ុនប៉ងបំផ្លាញកិច្ចដំណើរការ និងលទ្ធផលបោះឆ្នោតសកលនាពេលមុខនេះ ដូច្នេះកងកម្លាំងនគរបាលជាតិ នៅមានភារកិច្ចជាច្រើនទៀត ដែលត្រូវបំពេញ ដើម្បីធានាភាពសុខសាន្ដជូនប្រជាពលរដ្ឋ និងធានាឱ្យបាននូវបរិយាកាសសន្ដិសុខល្អប្រសើរ សម្រាប់យុទ្ធនាការបោះឆ្នោត ជ្រើសតាំងតំណាងរាស្ដ្រ នីតិកាលទី៦ នៃរដ្ឋសភាឲ្យដំណើរការប្រកបដោយជោគជ័យ។ សូមអានសារលិខិតរបស់លោកនាយករដ្ឋមន្រ្តី ហ៊ុន សែន ទាំងស្រុងខាងក្រោម៖