លោកនាយករដ្ឋមន្រ្ដី ហ៊ុន សែន ប្រាប់ជនរួមជាតិថា លោកមានសុខភាពល្អធម្មតា និងហាត់ប្រាណបានទៀងទាត់ថែមទៀតផង

លោកនាយករដ្ឋមន្រ្ដី ហ៊ុន សែន នៅរសៀលថ្ងៃទី៤ ខែឧសភា ឆ្នាំ២០១៨នេះ បានចេញមកអះអាងថា សុខភាពរបស់លោក គឺល្អប្រសើរជាធម្មតា ហើយបានហាត់ប្រាណជាទៀងទាត់ថែមទៀតផង។ ការចេញពីមកបញ្ជាក់ពីស្ថានភាពសុខភាពនេះ បានធ្វើឡើងបន្ទាប់ពីលោកនាយករដ្ឋមន្រ្ដី សង្ស័យថា មានប្រជាពលរដ្ឋមួយចំនួនយល់ច្រឡំថាសម្តេចមានបញ្ហាសុខភាព ក្រោយពេលពួកគេបានឃើញរូបភាពលោកសម្រាកក្នុងមន្ទីរពេទ្យ ដែលបានបង្ហោះលើទំព័រ Facebook កាលពីឆ្នាំ២០១៦នោះ។ លោកនាយករដ្ឋមន្ត្រី បានបញ្ជាក់យ៉ាងដូច្នេះ «ថ្ងៃនេះមានបងប្អូនមួយចំនួន បានផ្ញើសារមកជូនពរខ្ញុំ និងទូរស័ព្ទមកសួរពីសុខភាពខ្ញុំ។ តាមការសន្និដ្ឋានរបស់ខ្ញុំប្រហែលមកពីរូបថត ១សន្លឹកដែលខ្ញុំស្ថិតក្នុងមន្ទីរពេទ្យកាលពីឆ្នាំ២០១៦ ដែលធ្វើឲ្យមានការភ័ន្តច្រឡំ។ ពេលនេះសុខភាពខ្ញុំល្អណាស់ថែមទាំងហាត់ប្រាណបានទៀងទាត់ផង»។ លោកនាយករដ្ឋមន្រ្ដី ហ៊ុន សែន ក៏បានថ្លែងអំណរគុណដល់ជនរួមជាតិទាំងអស់ ដែលបានព្រួយបារម្ភពីសុខភាពរបស់លោកផងដែរ ៕