លោកនាយករដ្ឋមន្រ្តី ហ៊ុន សែន ប្រកាសជាថ្មីថានៅតែបន្តរួមរស់ជាមួយបងប្អូនជនរួមជាតិគ្រប់កាលៈទេសៈទាំងអស់ដើម្បីថែរក្សាការពារសន្តិភាពឱ្យនៅគង់វង្សយូរអង្វែងតកូនចៅ

លោកនាយករដ្ឋមន្រ្តី ហ៊ុន សែន នៅថ្ងៃសៅរ៍ទី១២ ខែឧសភា ឆ្នាំ២០១៨ តាមរយៈបណ្តាញសង្គម Facebook បានបញ្ជាក់ថា លោកនៅតែបន្តនៅជាមួយបងប្អូនជនរួមជាតិគ្រប់កាលៈទេសៈទាំងអស់ដើម្បីថែរក្សាការពារសន្តិភាពឱ្យនៅគង់វង្សយូរអង្វែងសម្រាប់កូនចៅខ្មែរជំនាន់ក្រោយ។ លោកនាយករដ្ឋមន្រ្តី ហ៊ុន សែន បានសរសេរក្នុង Facebook របស់លោកថា៖ «កូនក្មួយយុវជនជំនាន់ក្រោយពិតជាមានសំណាងខ្លាំងណាស់ដែលបានកើតចំពេលកម្ពុជាមានសន្តិភាព។ ពេលកូនក្មួយធំដឹងក្តីហើយ មិនបានឃើញពីអ្វីដែលកម្ពុជាធ្លាប់បាន ឆ្លងកាត់ពីមុនដូចជាសង្រ្គាម និងរបបកាប់សម្លាប់ប្រល័យពូជសាសន៍ គឺកូនក្មួយមួយចំនួនមិនជឿឡើយ។ កម្ពុជាទម្រាំបានដូចសព្វថ្ងៃ គឺយើងបានខិតខំខ្លាំងណាស់ ក្នុងនោះក៏មានចំណែកនៃការចូលរួមរបស់ជីតា និងជីដូនរបស់ក្មួយៗផងដែរ»។ លោកនាយករដ្ឋមន្រ្តី ហ៊ុន សែន បានសរសេរបន្តថា «ពិតណាស់ក្មួយៗ ប្រទេសយើងកាលពីជាង៤០ឆ្នាំមុន គឺលំបាកវេទនាខ្លាំងបំផុត ជីដូនជីតាក្មួយៗ គឺជាសាក្សីរស់ស្រាប់។ ក្នុងរបបប្រល័យពូជសាសន៍ ប៉ុល ពត ពលរដ្ឋត្រូវបានបង្ខំឲ្យធ្វើការជាងសត្វធាតុទៅទៀត គ្មានផ្ទះរស់នៅ គ្មានអាហារញាំគ្រប់គ្រាន់ គ្មានមន្ទីរពេទ្យ គ្មានសាលារៀន គ្មានវត្តអារាម គ្មានផ្សារ គ្មានអាគារទំនើប ហើយពលរដ្ឋ គឺគ្មានសិទ្ឋិសេរីភាពអ្វីទាំងអស់។ មានពលរដ្ឋជាង៣លាននាក់ ត្រូវបានស្លាប់តែក្នុងរវាង៣ឆ្នាំ ៨ខែ ២០ថ្ងៃ។ ពេលដែលពូបានដឹកនាំកងកម្លាំង វាយរំដោះប្រទេសពេលចូល ដល់ទីក្រុងភ្នំពេញនាឆ្នាំ ១៩៧៩ ពេលនោះទីក្រុងភ្នំពេញ យើងមានមនុស្សតែ៧០នាក់ប៉ុណ្ណោះ ហើយទីក្រុងទាំងមូលត្រូវបានបោះបង់ ចោលគ្មានមនុស្សរស់នៅក្លាយជាចំការចេក ដែលគួរឲ្យអាណោចអធម្មបំផុត។ យើងមិនចង់ឲ្យស្រមោលអតីតកាលវិលត្រឡប់មកវិញឡើយ។ ពូបានរួមរស់នៅជាមួយបងប្អូនជនរួមជាតិ គ្រប់រស់ជាតិលំបាកស្រណុក ហើយពូនៅតែបន្តនៅជាមួយបងប្អូនកូនក្មួយគ្រប់កាលៈទេសៈ។ លោកនាយករដ្ឋមន្រ្តី ហ៊ុន សែន ក៏បានគូសបញ្ជាក់ថា ដើម្បីថែរក្សាការពារសន្តិភាពឱ្យនៅគង់វង្សយូរអង្វែង ដើម្បីធានាបាននូវសុខសន្តិភាព និងការអភិវឌ្ឍ សូមជនរួមជាតិ និងក្មួយៗបោះឆ្នោតឱ្យគណបក្សប្រជាជនកម្ពុជា នោះប្រទេសជាតិយើងកាន់តែមានស្ថិរភាព វិបុលភាព និងសុខដមរមនាទៅមុខទៀតជាក់ជាមិនខាន។ លោកក៏បានជូនពរបងប្អូនជនរួមជាតិ និងក្មួយៗបានសប្បាយរីករាយក្នុងថ្ងៃ សម្រាកចុងសប្តាហ៍គ្រប់ៗគ្នាផងដែរ៕