ឯកឧត្តម ហ៊ុន ម៉ាណែត អំពាវនាវឲ្យប្រជាពលរដ្ឋ ចូលរួមបោះឆ្នោតឲ្យបានគ្រប់ៗគ្នា ដើម្បីជ្រើសរើសអ្នកដឹកនាំ ដែលនិយាយពិត ធ្វើពិត និងទទួលខុសត្រូវពិតប្រាកដ

(កំពត)៖ ថ្លែងចេញពីខេត្តកំពតឯកឧត្តម ហ៊ុន ម៉ាណែត បានអំពាវនាវដល់លោកយាយ-លោកតា សិស្សានុសិស្ស លោកគ្រូ-អ្នកគ្រូ ប្រជាពលរដ្ឋ អញ្ជើញទៅចូលរួមបោះឆ្នោត ឲ្យបាន គ្រប់ៗគ្នា ដើម្បីកាត្វកិច្ចប្រជាពលរដ្ឋ ជ្រើសរើសអ្នកដឹកនាំ ដែលនិយាយពិត ធ្វើពិត និងមានទទួលខុសត្រូវពិតប្រាកដ ជាមួយប្រជាពលរដ្ឋ ដែលធ្វើឲ្យប្រជាពលរដ្ឋសម្បូរសប្បាយ និងប្រទេសជាតិរីកចម្រើន។ ការអំពាវនាវយ៉ាងដូច្នេះ បានធ្វើឡើងក្នុងឱកាសដែលឯកឧត្តម ហ៊ុន ម៉ាណែត តំណាងសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន អញ្ជើញចូលរួម ជាអធីបតី ក្នុងពិធីសម្ពោធសាលាធម្មសភា និងសមិទ្ធផលនានា ក្នុងវត្តក្រូចឆ្មារ ស្ថិតក្នុងភូមិគក ឃុំម្រោម ស្រុកអង្គរជ័យ ខេត្តកំពត នាថ្ងៃទី១៥ ខែឧសភា ឆ្នាំ២០១៨ ម្សិលមិញនេះ។ ថ្លែងនៅក្នុងពិធីសម្ពោធសាលាធម្មសភា និងសមិទ្ធផលនានា ក្នុងខេត្តកំពតខាងលើនេះឯកឧត្តម ហ៊ុន ម៉ាណែត ក៏បានលើកឡើងផងដែរថា «យើងទាំងអស់គ្នា ត្រូវចូលរួមថែរក្សា ការពារនូវសន្តិភាព ឲ្យបានគង់វង្ស និងប្រឆាំងដាច់ខាត គ្រប់ចលនាណាមួយ ដែលមានបំណងចង់បំផ្លាញសុខសន្តិភាព នៅក្នុង ប្រទេសកម្ពុជា»។ ឯកឧត្តម ហ៊ុន ម៉ាណែត បានបញ្ជាក់ថា សន្តិភាពនេះ គឺបានមកដោយការលំបាក ដោយការលះបង់សាច់ស្រស់ ឈាមស្រស់ និងអាយុជីវិត របស់វីរៈជន ស្នេហាជាតិនៃយើង ហើយត្រូវ ចូលរួម គាំទ្ររាជរដ្ឋាភិបាលកម្ពុជា គាំទ្រគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាន និងជាប្រមុខដឹកនាំ ប្រទេសជាតិបន្តទៀត។