លោកបណ្ឌិត ហ៊ុន ម៉ាណែត ជួបសំណេះសំណាលជាមួយបងប្អូនប្រជាពលរដ្ឋខ្មែរនៅប្រទេសជប៉ុនជាង៤០០នាក់ មុនបញ្ចប់ដំណើរទស្សនកិច្ចនៅប្រទេសជប៉ុន

មុនបញ្ចប់ដំណើរទស្សនកិច្ចនៅប្រទេសជប៉ុននាល្ងាចថ្ងៃទី២៨ ខែមេសា ឆ្នាំ២០១៨ លោកបណ្ឌិត ហ៊ុន ម៉ាណែត បានជួបសំណេះសំណាលជាមួយបងប្អូនប្រជាពលរដ្ឋខ្មែរជាង៤០០នាក់ នៅទីក្រុងតូក្យូ ប្រទេសជប៉ុន ក្រោមបរិយាកាសរាក់ទាក់រីករាយស្និទ្ធស្នាលជាទីបំផុតក្នុងនាមស្មារតីខ្មែរស្រឡាញ់ខ្មែរ-ខ្មែរតែមួយ។ ក្នុងឱកាលសំណេះសំណាលនេះ លោកបណ្ឌិត ហ៊ុន ម៉ាណែតបានពាំនាំការផ្តាំផ្ញើរសាកសួរសុខទុក្ខពីលោកនាយករដ្ឋមន្រ្តី ហ៊ុន សែន ជូនដល់បងប្អូនប្រជាពលរដ្ឋខ្មែរទាំងអស់ដែលកំពុងរស់នៅប្រទេសជប៉ុន។ បន្ថែមពីលើនេះ លោកបណ្ឌិត ហ៊ុន ម៉ាណែត ក៏បានជម្រាបជូនបងប្អូនអំពីស្ថានភាពពិតបច្ចុប្បន្នរបស់កម្ពុជា និងការអភិវឌ្ឍប្រទេស ដែលជាសមិទ្ធផលបានមកពីការខិតខំប្រឹងប្រែងរបស់រាជរដ្ឋាភិបាលកម្ពុជាដែលដឹកនាំដោយលោកនាយករដ្ឋមន្ត្រី ហ៊ុន សែន។ ស្ថិតក្នុងបរិយាកាសនៃការជួបជុំគ្នានេះបងប្អូនពលរដ្ឋខ្មែរបានសម្តែងក្តីសប្បាយរីករាយក្រៃលែងដែលលោកបណ្ឌិតបានឆ្លៀតពេលវេលាដ៏មមាញឹកក្នុងដំណើរទស្សនកិច្ចមកជួបសំណេះសំណាលសាកសួរសុខទុក្ខផ្ទាល់ជាមួយបងប្អូនខ្មែរនាពេលនេះ ដែលកាយវិការនេះបង្ហាញឱ្យឃើញអំពីការស្រឡាញ់និងឱ្យតម្លៃជាតិខ្មែរ ទោះបីខ្មែរនៅទីណាក៏ដោយ ក៏ខ្មែរស្ថិតក្រោមមេឃតែមួយ នេះហើយជាមហាគ្រួសារខ្មែរ។ ជាមួយគ្នានេះបងប្អូនខ្មែរនៅប្រទេសជប៉ុនសង្ឃឹមថានឹងបានជួបលោកបណ្ឌិត ហ៊ុន ម៉ាណែត ជាថ្មីម្តងទៀត។ សូមជម្រាបជូនថា តបតាមការអញ្ជើញរបស់រដ្ឋាភិបាលជប៉ុន លោកបណ្ឌិត ហ៊ុន ម៉ាណែតបានដឹកនាំគណៈប្រតិភូធ្វើទស្សនកិច្ចរយៈពេល៥ថ្ងៃពីថ្ងៃទី២៤ ដល់ថ្ងៃ២៩ ខែមេសា ឆ្នាំ២០១៨ នៅទីក្រុងតូក្យូ ប្រទេសជប៉ុន ដែលក្នុងអំឡុងពេលទស្សនកិច្ចនៅប្រទេសជប៉ុននេះ លោកបណ្ឌិត ហ៊ុន ម៉ាណែត បានចូលជួបសម្តែងការគួរសម និងពិភាក្សាការងារជាមួយថ្នាក់ដឹកនាំជាន់ខ្ពស់នៃរដ្ឋាភិបាលជប៉ុន ដូចជាលោកនាយករដ្ឋមន្ត្រីជប៉ុនលោករដ្ឋមន្ត្រីការបរទេសជប៉ុន លោករដ្ឋមន្ត្រីការពារជាតិជប៉ុន លោកអគ្គបញ្ជាការ លោកមេបញ្ជារការជើងគោកកងស្វ័យការពារ និងលោកអនុប្រធានគណបក្សប្រជាធិបតេយ្យសេរី លោកអនុរដ្ឋមន្ត្រីការបរទេស ព្រមទាំងឥស្សរជន និងសមាជិកសភារបស់ជប៉ុនជាច្រើនរូបទៀតផងដែរ៕