តើប្រទេសណាជា​មហាអំណាច ទាំងសេដ្ឋកិច្ច និង​យោធាក្នុងតំបន់អាស៊ាន????

យោង​តាម​របាយការណ៍របស់​មូលនិធិរូបិយវត្ថុអន្តរជាតិ (IMF)​ ឥណ្ឌូណេស៊ី មាន​ប្រជាជន​សរុប​ជាង ២៦១លាននាក់ មានទំហំ​សេដ្ឋកិច្ចជាង ១,០១ទ្រីលាន​ដុល្លារអាមេរិក GDP Per Capita ៣៨៥៨ដុល្លារ និង​កម្លាំង​ពលកម្មសកម្ម​សរុប ១៣០លាន​នាក់។

រដ្ឋធានី​ហ្សាការតា ប្រទេស​ឥណ្ឌូណេស៊ី ដោយឡែក ផ្អែកលើរបាយការណ៍ចេញផ្សាយដោយ Global Firepower កាលពីពាក់កណ្តាលឆ្នាំ២០១៧ ឥណ្ឌូណេស៊ី មិនត្រឹម​តែឈរជាប្រទេសមហាអំណាចយោធាលេខ ១ នៅ​អាស៊ាន​ប៉ុណ្ណោះទេ ប្រទេសនេះ ក៏​ឈរនៅលេខរៀងទី១៤ នៃប្រទេសមហាអំណាច​យោធា​ទូទាំង​ពិភពលោក​ផងដែរ ដោយមាន​កញ្ចប់​ថវិកា​សម្រាប់វិស័យ​​ការពារ​ជាតិ ៦៩០០លាន​ដុល្លារ កងយោធា​សរុបជាង ៩៧ម៉ឺន​នាក់ ក្នុងនោះ​​យោធាសកម្ម​ជាង ៤៣ម៉ឺន​នាក់ យោធា​បម្រុង ៥៤ម៉ឺន​នាក់ និង​មនុស្សគ្រប់​អាយុ​ចូលបម្រើ​កងទ័ព ៤,៥លាន​នាក់។
ក្នុងវិស័យការពារដែន​អាកាស ឥណ្ឌូណេស៊ី មានយន្តហោះ​សរុប ៤៤១គ្រឿង ក្នុងនោះ​យន្តហោះ​ចម្បាំង (Fighter Aircraft) ៣៩គ្រឿង យន្តហោះ​វាយប្រហារយន្តហោះ​ចម្បាំង (Attack Aircraft) ៥៨គ្រឿង យន្តហោះ​ដឹកជញ្ជូន​កងទ័ព (Transport Aircraft) ១៣០គ្រឿង យន្តហោះ​សម្រាប់បង្វឹក (Trainee Aircraft) ១១១គ្រឿង ឧត្ថម្ភាគចក្រ (Helicopter Strength) ១៤៧គ្រឿង និងឧត្ថម្ភាចក្រ​ចម្បាំង​ទំនើបបំផុត (Attack Helicopter) ចំនួន ៥គ្រឿង។

ក្នុងវិស័យការពារដែនទឹក ឥណ្ឌណេស៊ី មាននាវាសរុប ២២១គ្រឿង ក្នុងនោះ នាវា​ចម្បាំង​ខ្នាតធំ (Frigates) ៧គ្រឿង នាវា​ចម្បាំង​ខ្នាតតូច (Corvettes) ២៤គ្រឿង នាវាមុជទឹក (Submarines) ៤គ្រឿង នាវា​ប្រដេញ (Patrol Craft) ៧៤គ្រឿង និងនាវា​សម្រាប់​វាយប្រហារ​នាវា​មុជទឹក (Mine Warfare Vessels) ១២គ្រឿង។
សម្រាប់វិស័យការពារដែនគោក ឥណ្ឌូណេស៊ី មានរថក្រោះ (Tank) ៤១៨គ្រឿង រថពាសដែក (Armored Fighting Vehicles) ១០៨៩គ្រឿង រថពាស​ដែកបំពាក់​កាំភ្លើងស្វ័យប្រវត្តិ (Self-Propelled Artillery) ៣៧គ្រឿង កាំភ្លើង​ធំចល័ត (Towed Artillery) ៨០គ្រឿង និងរថយន្ត​សម្រាប់​បាញ់​គ្រាប់រ៉ុកកែត (Rocket Projector) ចំនួន ៨០គ្រឿង។

គួរ​បញ្ជាក់ថា របាយការណ៍​របស់​មូលនិធិរូបិយវត្ថុអន្តរជាតិ (IMF) គិតត្រឹមខែតុលា ឆ្នាំ២០១៧ បង្ហាញ​ថា អាស៊ានមានទំហំពាណិជ្ជកម្ម​សរុបជាង ២,៧ទ្រីលាន​ដុល្លារ​​​អាមេរិក ដើរតួជា​ទីផ្សារ​សេដ្ឋកិច្ចធំ​បំផុតទី៤ នៅលើ​ពិភពលោក បន្ទាប់ពី​សហរដ្ឋអាមេរិក ចិន និងជប៉ុន ខណៈ GDP សម្រាប់​ពលរដ្ឋ​ម្នាក់​ជាមធ្យម (GDP Per Capita) ៤២១៩ដុល្លារ៕